Passant is prucessionis
a sonu de tamburru
calendi de sa Seu
po ingirai is setti cresias.

Is germanus cun s'anima,
nieddus, biancus, asulus,
arrubius che purgadoriu
a pampas; a cappitta,
a cuguddu stampau
po is ogus, arresant
cun s'arrosariu a pibionis
mannus che olia franzesa
accappiau a sinzu cun su cordoni.

Passant anant”e totus,
is istendardus nieddus
cun su caboni e Caifas,
is obilus e is dadus,
sa scala e is angiuleddus.
Is coristas avatu, a undas,
abbrazzettaus a arrengheras,
cantant a disisperu
is prantus de Maria
chi circat su Fillu
cun setti ispadas in coru.

Addoppiat su tamburru s'agonia.

Su maistu a s'imbressi,
donat s'intonazioni
a is bascius arrodaus,
a is tenoris matuccus,
a is pipius sopraneddus:
“Languida e sospirosa
lunga e pungente spina”
narat su cantu tristu
chi arremoddiat su coro.

Affacciadas a is bascius
is gomais a cazzolas
firmant unu momentu
s'allichidongiu 'e Pasca.

“Castia su santuanneddu:
Fisiettu de Antuninu,
su fillu de Arremundu
conch'e mallu”. “Chini?”
“Comenti chini? Su viudu
de zietta Mercede de manifattura”.

“Castia su carnazzeri
chi bendit su brentamini
in s'arrugh'e is Argiolas”.

Addoppiat su tamburru s'agonia.

“Alcanzaimì custa grazia,
Nostrassignor”e is dolus”.

Passat su prucessioni:
sanzinant is lantionis,
is cantoris attaccant
su prantu de is Marias

“Aterus annus”. “Deus bollat”.

Currendi unu cunfrari
bessit de s'osteria.

Is tamburrus addoppiant
de Gesus s'agonia.

C.P

©. 2026 Paolo De Magistris - Tutti i diritti riservati