Costantino Longu

1

Su candidadu chi a Bessude andesit

gai lis nesit a sos de inie

comente su comiziu fattesit:

“Si deputadu faghides a mie

no at a esser debbadas – lis nesit –

bo nd’ agattades bene calchi die:

in cuss’ addiggiu chi amos de fronte

luego bi faghimos unu ponte.”

2

Unu senza risposta non lu lassat

cussu prommiter’ istraordinariu:

“Cue non b’ est su ponte nezzessariu

dadu chi mancu riu bi nde passat!”

Però cuddu ‘e morale non s’ abbassat

su progettu enindeli contrariu:

“Già chi est gai, nois chi podimos,

tando su riu puru bi faghimos!”

3

Intantu resultesit deputadu

cun votos bonos, non fit su culìu,

ma cand’ a su cadreone ch’ est pigadu

a sas prommissas lis nesit adiu.

Prus de Bessude non s’ est ammentadu

e non b’ at fattu né ponte e né riu;

su bestiamene ch’ in su sartu fidi

totu, pro issu, fit mortu de sidi.

4

Sos de Bessude gia l’ ana connotu

su chi faghiat ponte cun fiumene,

però l’ ana mantesu sempre ignotu

iscobiadu mai l’ an su numene.

Sos deputados gai sunu totu

a prommitter lu tenen de costumene:

cand’ in Montezitoriu si assentana

de sas prommissas fattas non s’ ammentana.