Sos ammentos de s’amore
di Franceschino Satta

Solu e tristu in su dolore
gherro libido ’e s’anneu.
Si ti pesso, in coro meu
prango lacrimas d’amore.
Chin su bentu ti ricamo
su respiru ch’hapo in coro:
ti ricamo, bella, in oro,
sas paragulas chi bramo.
Ti do tottu, tottu cantu:
sos disizos, sos segretos,
sas promissas, sos affettos,
tottu, tottu iffustu ’e prantu.
Cando torrat su beranu
intro ’e nues passizeras,
ponzo fattu a sas chimeras,
a su risu prus galanu.
Sos ammentos de s’amore
sun ispinas e peleas.
Los abbrazzo. In manos meas
s’apposentet su dolore.
Deus meus, chi t’adoro
l’ischis. Nara ite t’impinno?
Devotissimu mi sinno,
devotissimu t’improro.