Costantino Longu

Atteros tempos in sa processione

de mesaustu, bi fin sas mandas,

cun sas menzus ispigas seberadas

pro rezzire sa bendissione.

Da’ sa massaza fin cun passione

de nastros coloridos adornadas;

como cussas usanzias sun passadas,

est isparida sa tradizione.

Como non b’ at messeras né arzolas,

né chie sas manadas beneigada

in sa processione ‘e mesaustu.

Non s’ arat annigrinu né bedustu,

su massaggiu in s’ incunza non fadigat;

sas campagnas restadas sunu solas.

Semenad’ in attunzu donzi ranu

beniat de sa manada beneitta,

de su terrinu in sa menzus fitta;

su massaggiu, che bonu cristianu,

su sinnu si faghiat cun sa manu,

ponindes’ in su coddu sa berritta

e prommitinde chi cun sa zappitta

l’azuada in zerru e in beranu.

Pregaiat cun fide a conca nuda

faghindeli a Deus sa domanda

chi cussu trigu enzeret avveradu.

In s’ arzola lu poniat a banda

pro su semene bonu, ischeliadu,

e sighiat de gai a donzi muda.