Costantino Longu

1

In su tempus chi s’ istaiat male,

sos zuarzos anzenos, poberittos,

si leaian duos sagonittos

bene s’ arrodaian sa istrale,

che pigaian a su comunale

inue fin sos buscos pius fittos,

ca tando sa miseria fit tanta,

pro attire sa linna ‘e zoza santa.

2

Issos si tuccaian a fiottos,

troppu obbidientes fini e bonos,

sa linna pro attire a sos padronos

sighinde sos costumenes connotos;

ca fini sottomissos e devotos

non nde cherian de malos insonos;

da’ su mercuris sero tuccaiana

a usu de izadorzu lu faghiana.

3

O puru de Sas Costas in sa tanca,

pro cuntentare sa padrona ricca,

chircaian sa linna pius sicca

possibilmente ch’ esseret bianca,

e a cantu podian traer s’ anca

nde falaian a su ficca ficca:

barriados che ainos tentorzos

faghian ott’ e deghe pasadorzos.

4

Calchi notte faghiat temporale

esserede in martu o in abrile,

si franghian in perca o in cuile,

sa fasche cumponian eguale

cun dunu bene fattu cuccurale

e de filighe irde su tedile,

pro ch’ onzi trama giuteran infusta

devian remuire a s’ ora giusta.

5

Supportaian simile cundanna

cando sa zente non fidi mandrona;

a su manzanu chito, sa padrona

fit sempre pront’ a l’ abberrer sa gianna,

pro controllare si fit fasche manna

e si fit veramente linna ona:

si fit bona pro furru e pro foghile

si mustraiat cuntenta e gentile.

6

Sighian gai sa tradizione

senza bi nd’ aer perunu murrunzu,

bustaian pro fagher su zeunzu

a mesudie prezisu in unione

unu piattu de pisu e pistizone

de cariga e pilarda calchi punzu.

Auguraian cun bon’ isperanzia

a medas annos sighire s’ usanzia.

7

Sos poberos chi fin zuarzos fissos

obbidian in s’ era bisonzosa;

narat como sa zente ispiritosa:

“Fin maccos a esser gai sottomissos.”

Si a cussos tempos fin bistados issos

fit resultada sa matessi cosa;

in cussos tempos penosos e tristos

parian tontos finas sos abbistos.