Costantino Longu

S’ urtimu mumuzolu las iscrazzat

sas naes begras de s’ arbure mia;

biancos meuddinos sa traschia

b’ at lassad’ in sas chimas pius artas.

Sas fozas, ingroghidas, sun ispartas,

pilisadas si biden bola ‘ola.

Tota prighizonada est sa corzola,

pius comente primma no est prana.

Sa linna de su truncu est pagu sana,

est una tuva piena de funghedda

ue de alibeddes una chedda

in custos annos s’ at fattu su nidu.

Totu a band’ ‘e intro est deperidu,

s’ allattadorza pagu suzzu cazzat.

In primma fini urigas sas naes,

ingrussandes’ in dunu modu raru,

bestindesi de frunzas e de frasca.

Che accudian a truma sas aes

pro chilcare inoghe su riparu

cand’ infuriaiat sa burrasca.

Como, cand’ est attunzu, a sa cortina

non che nde falat pius de fozisina.