Poesia in lingua sarda
Pro un'avaru
Naran chi prus de chentu miliones
tenet depositados in sas bancas,
prenas de accas las tenet sas tancas
e bamas mannas in sas bidatones;
in domo arga in totu sos cuzones,
mugheddosu in cara e in farrancas,
non bestit mai camisas biancas,
cabbanu ezzu e bezzos sos carzones.
Usat ancora sa primma berritta
chi comporadu l’ aiat sa mama
dae unu mercante luresincu:
est passande sa vida trista e fritta,
de s’ isposare no at tentu brama
ca fit pro issu su prus malu brincu.
In domo sua est totu a s’ antiga
cansiada non b’ est sa ziviltade,
pro chi non siat in nezzessidade
s’ ozu lu ogat dae sa frommiga.
Est tota vida filande restiga
pro fagher crescher sa prosperidade,
non si trattenet in sozziedade,
in su zilleri mai at fattu briga.
Dinari nde dat puru a interessu
pretendet finas su trinta pro chentu,
li est cumpanza intima s’ usura;
pro cando morit, ca s’ idet arressu,
l’ at fatt’ iscrier in su testamentu
ch’ ispendan pagu pro sa sepoltura.