Costantino Longu

Sonadu at a luttu sa campana

in sas alturas de su Gennargentu;

su sou tristu e luttuosu lamentu

totu sos sardos iscultadu l’ana,

proite ch’a dogn’adde pius lontana

su rintoccu leadu che at su entu:

resone tenet s’in custu momentu

est pianghinde sa zente isolana.

Mortu est su poeta “Montanaru”

paret chi siat nende cussu brunzu

cun s’eco chi si perdet in su monte;

at declinadu sa pensosa fronte,

sa pinna che l’est rutta dae su punzu,

s’armoniosa lira est in imbaru.