Poesia in lingua sarda
Musica
1
Frà Guido d’Arezzo musicista
inventad’ at sas notas musicales,
sa notazione pro legger’ a vista
in chimbe rigas totu sos signales;
da’ s’ innu de santu Giuanne Battista
sas sillabas ch’ at leadu iniziales,
poi chi tempus passesit però
s’ “ut” istesit cambiadu in “do”.
2
Gregoriu Magnu, s’antigu decoro
l’at devid’ a sa musica torrare,
pro chi sos sacros cantigos insoro
sempre intattos poteran restare,
s’Antifonariu cun cadenas d’oro
de santu Pedru ligat a s’altare;
da’ tand’ in susu dogni cristianu
ritu, giamadu fit “Gregorianu”.
3
Apollo a su miticu Anfione
una lira de oro li at donadu,
in mesu ‘e sos pastores allevadu
istesit in su monte Citerone,
la sonaiat a perfezione
chi at finas sas pedras incantadu:
miraculos faghet pro chie l’ iscultat
cando de Tebe su re che resultat.
4
Fini cosas divinas non terrenas
da’ Orfeu sas musicas sonadas,
de melodias suaves pienas
da’ sa mitologia sublimadas
chi finas de su mare sas sirenas
restaian iscultend’ incantadas,
sos pisches bistaian frimmos totu
e calmaian sas undas su motu.
5
Beru Omero famosu s’ est resu
cun sos duos poemas immortales.
Non sol’ in poesia si est trattesu
ma pur’ in istrumentos musicales,
in sas zittades grecas l’ an’ intesu
poberu, zegu, garrigu de males,
a sa ezzesa cun s’ arpa sonende
sos raros versos suos declamende.
6
Giuseppe Verdi de su Rinaschimentu
idulu fidi e animadore,
sa musica sua piena ‘e vigore
de su populu fit incitamentu;
fiduciosos in su novellu eventu
“Viva Verdi” gridaian cun ardore,
non solu ca in su sambenadu sou
su numene bi fit de su re nou.
7
Mercantini comente Alfieri
de vena patriottica animadu
“S’ ispigadora de Sapri” at cantadu
pro Garibaldi e pro Tito Speri,
però istesit da’ Olivieri
s’ innu de Garibaldi musicadu;
isquilladu l’ an totu sas trumbas
s’ innu de “S’ iscuguzana sas tumbas”.
8
De su mundu Nicolò Paganini
fit su violinista pius famosu;
su direttore d’ orchestra Toscanini
fidi ateretantu prestigiosu;
su liricu repertoriu de Puccini
est famadu ca est melodiosu:
lu meritat Puccini si l’ onoro
ch’ at “Sa Boheme” pro capolavoro.
9
De Vienna s’orchestra pius famosa
chi pro primma di’ ‘e annu sempre sonada,
a tota s’ Europa bi la donada
s’ ora pius bella e deliziosa;
sublim’ est tantu e melodiosa
in issa non bi nd’ at nota ch’ istonada,
naras, cand’ ‘e finire benit s’ ora:
“Ite peccadu a non sighire ancora”.
10
Sa primavera de fiores ricca
ponet su rusignolu in movimentu,
issu su prus attonadu istrumentu
lu costoit in sa ula piticca;
pro l’ iscultare in su buscu ti ficca,
soddisfattu nde restas e cuntentu:
comente in sos rampos si riparada
a istimare sa musica t’ imparada.
11
Pro fagher moer a tempus sos pese
la sonan’ una banda musicale;
an sos istados s’ innu nazionale
in sa Francia bi est “Sa Marsigliese”,
cando fin’ in Italia sos rese
la sonaian sa marcia reale,
como lu sonan de Mameli s’ innu
su ch’ at cumpostu s’ eroe pizzinnu.
12
Unu trumbettieri sempre b’ ada
in sa caserma cun sa trumba in manu,
issu sonat s’ “isveglia” su manzanu
e sonat puru pro dogni “adunada”;
cando sonande l’ est sa “ritirada”
sa trumba che l’ intenden’ a lontanu
e su “silenziu” cun notas de dolu
ti che faghet drommire solu solu.