Costantino Longu

Isterrida

Dae famiglia distinta naschidu

fit Lussurzu, valente capitanu,

send’ imperande Dioclezianu

at in Casteddu pro issu servidu.

A sa fide cristiana cunvertidu

si est, fuinde ogni legge pagana;

cunvertidu a sa fide cristiana

s’ est, dogni legge pagana fuinde,

unu salmu de Davide legginde

s’ innamorat de Gesusu e si donat.

De sordadu sa divisa abbandonat

de lu poder servire solu aspirat.

De Romana in sa grutta si ritirat

pro sas passadas culpas penitente,

ue at in su coro solamente

sa veridade divisa e prezisa;

de sordadu abbandonat sa divisa,

gradu, fama e onore at frundidu.

Primu fiore

De Sardigna in sas biddas est bessidu

azzendinde sas primmas ischintiddas,

in totue paganos cunvertinde;

de Sardigna essidu est in sas biddas

sas primmas ischintiddas azzendinde,

andat in mesu de sos isolanos

in totue cunvertinde paganos

unu segundu Paulu diventande.

Sa digna religione preigande

dad’ a su mundu sa novella lughe;

frundit s’ ispada, s’ abbrazzat sa rughe,

ch’ in issa mortu est su Redentore.

Segunde retroga

Dae famiglia distinta naschidu…

…frundidu gradu at, fama e onore.

Segundu fiore

Intantu su romanu imperadore,

pro piantu s’ associat in s’ imperiu

e pro istigazione de Galeriu,

su cristianesimu pro si dare a pèse,

s’ annu de Cristos treghentosetrese

fiera ordinat persecuzione.

De Galeriu pro istigazione,

pro si dare a pès su cristianesimu

e in difesa de su paganesimu

persecuzione ordinat fiera,

chi de sos martires est giamada s’ era

e guasi degh’ annos est durada;

ch’ est s’ era de sos martires giamada

ogni misfattu cummittin’ atroce.

Massimianu, crudele e feroce

cumpit tando sa sambenosa brama.

Terza retroga

Dae distinta famiglia naschidu…

…gradu frundidu at, onore e fama.

Terzu fiore

Però no istudat s’ ardente fiama,

Lussurzu sa idea non la mudat

a tal’ annunziu non s’ attristat nò;

s’ ardente fiama no istudat però

de fronte a su nemigu prus ingratu.

Barbaramente ligare l’ at fattu

in sa fide giurada frimmu addurada,

in su modu prus tristu lu torturada:

a colpos l’ at su dossu totu pistu;

Lu torurat in su prus modu tristu,

una piae sola est pulpa e ossu;

totu pistu a colpos l’ at su dossu,

sende gasie, creindelu mortu,

lassadu l’ ana senz’ esser regortu,

fuliadu in sutta de unu crastu

pro chi esseret diventadu pastu

de sas feras pettaris e de aes.

Però tantas orribiles piaes

li sunu pro miraculu sanadas

e dae nou in sas sardas contradas

de Cristos sa dottrina at preigadu.

Urtima retroga

Dae famiglia distinta naschidu…

…fama frundidu at, onore e gradu.

Urtimu fiore

Cand’ ana a Marcu sa notizia dadu,

sos prus fidados de sa sua milizia

in chirca de Lussurzu mandat tando;

Dad’ ana a Marcu sa notizia cando,

sos prus fidados de sa sua milizia

in chirca de Lussurzu tando mandat

e l’ arrestana mentres propagandat

sa dottrina de su Deus divinu.

Cirillu de Capadoccia e Camerinu

paris cun issu sighidu an sa sorte;

totos trese affrontana sa morte

chi lis at dadu sa barbara manu;

cun eroismu pius che umanu

su martiriu insoro ana rezzidu.

Deo sa moda mia apo finidu,

ma primma de finire, dae nou

auguro a custu Comitadu

e a totu s’ interu populadu

chi nde tenet s’ eternu nomen sou.

Iscusade sa mia incupetenzia,

arrivederci e bona permanenzia.