Costantino Longu

Isterrida

Poi de undighi seculos e mesu

chi Gesusu lassadu at custu mundu,

naschet Franziscu, s’ eroe segundu,

ch’ at sa lughe divina torr’ azzesu.

Su summu sacrifiziu vanu resu

fidi già dae su mundanu viziu;

vanu resu su summu sacrifiziu

fidi già dae su viziu mundanu;

su summu sacrifiziu resu vanu

fidi da’ sos inghirios de Satana.

Sos omines sa via no agattana

cussa ch’ indirizzadu lis at Cristos,

e fini tempos perversos e tristos

cando at Franziscu sos oios abbertu.

Fit su giardinu torradu a desertu,

abbandonadu su giustu caminu;

fit torradu a desertu su giardinu,

su giustu caminu abbandonadu;

fit su giardinu a desertu torradu,

abbandonadu su caminu giustu.

Però Franziscu cun brussu robustu

a rinnovare su giardinu tentada

e a totu sos omines ammentada

cal’ est sa via tracciada pro issos.

Primu fiore

Esplorat de sos coros sos abissos,

sos poberos famidos los ristorada;

pro cuss’ iscopu sun distribuidos

totu sos benes suos e tesoros.

Sos abissos esplorat de sos coros,

sos poberos famidos los ristorada;

de sos coros sos abissos esplorada,

los ristorat sos poberos famidos,

pro cuss’ iscopu sun distribuidos

sos benes suos e tesoros totu.

E una part’ ‘e su mundu at riconnotu

sa sua portentosa santidade,

ca cun illimitada caridade

at resu fruttos veramente raros.

In dogni tempus sos riccos avaros

a Franziscu trattadu l’ an pro maccu,

ca dae mere s’ est fattu teraccu

fuinde dogni gustu e piaghere,

a su motu evangelicu obbedinde

a sos vint’ annos ponindel’ in attu.

Ca dae mere teraccu s’ est fattu

fuinde dogni gustu e piaghere;

ca fattu s’ est teraccu dae mere

dogni gustu e piaghere fuinde,

a su motu evangelicu obbedinde

ponindelu in attu a sos vint’ annos.

Issu bestidu s’ est de ruzos pannos

e si reduit a pedulianu:

e l’ estendet pro attere sa manu

in dogni zanna, in dogni contrada.

Segunda retroga

Poi de undighi seculos e mesu…

…cal’ est sa via pro issos tracciada.

Segundu fiore

A sos vanos ispassos s’ adiu dada

fuit sos godimentos pius bassos;

s’ adiu dada a sos vanos ispassos

sos godimentos pius bassos fuidi

e teraccu ‘e su chelu si reduidi

sende pienu de briu giovanile.

Abbandonat su viver signorile

e de su mundu sos falzos cuntentos.

In sos pius lussuosos apposentos

issu podiat passare sa vida,

eppuru l’ at sa grutta preferida;

in cussu logu penosu e iscuru

bi vivet senza s’ alidu ‘e su fogu

senza guvrenu né susu né sutta.

Eppuru preferida l’ at sa grutta,

in cuss’ iscuru e penosu logu,

bi vivet senza s’ alidu ‘e su fogu

senza guvrenu né sutta né susu.

E sa die chi patit de piusu

pius cuntentu a Deus lu ringraziat;

cue de cibos bonos non si saziat

ma si buscat pro viver’ erba areste.

Terza retroga

Poi de undighi seculos e mesu…

…sa via tracciada pro issos cal’ este.

Terzu fiore

Aspirat a sa gloria celeste

sas cosas de sa terra no ammirada,

sun sas bideas suas luminosas

iscola pro una vida transitoria.

A sa celeste aspirat de gloria

sas cosas de sa terra no ammirada;

a sa gloria celeste aspirada

no ammirada de sa terra sas cosas,

sun sas bideas suas luminosas

iscola pro sa transitoria vida.

E si s’ umanidade tota unida

imiteret sa sua caridade,

diat amare su frade a su frade

in sas famiglias e in sas nazziones.

Finas sas sozziales chistiones

senza bi nd’ aer gherras intestinas;

sas sozziales chistiones finas

senza bi nd’ aer intestinas gherras,

né perunas penosas cuntierras

sos poberos mortales risolviana.

Si s’ ingordigia l’ abbandonaiana

non fit su mundu de sambene intrisu,

ma fit unu terrestre paradisu

pienu de paghe santa e armonia.

Urtima retroga

Poi de undighi seculos e mesu…

…pro issos est tracciada cale via.

Urtimu fiore

Semenadu a ramos de olia

su mundu totu cantu fit bistadu

sighinde sa dottrina ‘e custu santu,

invece pari pari nos iscannamos.

Semenadu de olia a ramos

su mundu totu cantu fit bistadu;

a ramos de olia semenadu

su mundu fit bistadu totu cantu,

sa dottrina sighinde ‘e custu santu

invece nos iscannamos pari pari.

S’ omine ingordu de fama e dinari

totu sa terra semenat de tumbas,

proibit de olare sas columbas,

dominan sos unturzos sas aeras.

Lupos e ienas, tigres e panteras

sa nott’ oscura cun ululos cupos

incutini timoria e paura

inue mancan sas serenas paghes.

Sa terra la trasformat in furraghes

s’ omine chi chilchende est epopeas;

sighimos de Franziscu sas bideas

si cherimos passare bella vida.

Ecco sa moda mia chi est finida

e lu pretendo chi enza iscusadu:

auguro chi custu Comitadu

potat tenner suzzessu pius mannu,

est veramente dignu de lodare

ca est risultadu a organizare

sas duas festas intro de un’ annu.

Intantu bos saludo e cumpatide,

unu caru abbrazzu lu rezzide.