Costantino Longu

Non m’ imputedas chi fatt’ un’ abusu

si lasso a Isidoro incalculadu;

treghentoschimbant’ annos e piusu

Santu Bachis in bidda est veneradu,

dae cando sas modas sun’ in usu

mai nessunu pro issu at cantadu:

si permittides, ca in vena m’ agatto,

deo pro issu sa moda la fatto.

Isterrida

Santu Bachis, su martire romanu,

fit in su terzu seculu naschidu,

in su tempus ch’ in Roma proibidu

fit pro totus su cultu cristianu.

Faghet part’ ‘e s’ esercitu paganu

ca li piaghet sa militare arte;

de s’ esercitu paganu faghet parte

ca s’ arte militare li piaghet;

de s’ esercitu paganu parte faghet

in sutta su cumandu imperiale;

si distinghede che ufficìale

l’ usan sos superiores rispettu.

Dotadu est de profundu intellettu,

de segundu cumandante at su gradu;

de profundu intellettu est dotadu,

su gradu at de cumandante segundu;

dotadu est de intellettu profundu,

est attivu, espertu e virtuosu:

comente gherrieri valorosu

est bene idu da’ Massimianu.

Primu fiore

Adorat issu dogn’ idulu vanu

e a Gesusu crocefissu ignorat;

dogni idulu vanu issu adorat

e ignorad’ a Gesusu cocefissu;

dogni idulu vanu adorat issu

de sa fide de Cristos nd’ est ignotu.

Cand’ at su cristianesimu connotu

su paganesimu abbandonat tando;

su cristianesimu at connotu cando

tando abbandonat su paganesimu;

cand’ at connotu su cristianesimu,

mancari chi esseret persighidu

dae Massimianu incrudelidu

diventat seguace cun ardore.

Pro penasa s’ ingratu imperadore

fattu ligare l’ at cun sas cadenas;

s’ ingratu imperadore pro penas

cun sas cadenas ligare l’ at fattu;

pro penas s’ imperadore ingratu

a sos prus sambenaris lu cunsignat

e ca de adorare non si dignat

sa pedra priva de sos sentimentos,

pro beffe, pro irgonza e pro turmentos,

sa persona sua pro esser derisa,

l’ ispozan sa militare divisa

e l’ an cun pannos de femina estidu.

Segunda retroga

Santu Bachis, su martire romanu…

…dae Massimianu est bene idu.

Segundu fiore

Che indignu, pro vilesa, est reduidu

a cuss’ abidu ‘e debilesa signu;

pro vilesa, reduidu est che indignu

a cuss’ abidu signu ‘e debilesa;

che indignu reduidu est, pro vilesa,

gasìe cun ischerzos lu fastizana.

In sas romanas vias lu passizana

pro soddisfagher sas paganas manias;

lu passizan in sas romanas vias

pro soddisfagher sas manias paganas;

lu passizan’ in sas vias romanas

cun dunu collare de ferru pesante

post’ a su tuggiu, che ladru birbante

chi faghet male in totu sas contradas.

S’ ira insoro s’ impiegat debbadas,

non rinnegat sa fide chi at in coro;

debbadas s’ impiegat s’ ira insoro,

sa fide chi at in coro non rinnegat;

s’ ira insoro in debbadas s’ impiegat,

at in sé una forza adamantina

chi li provenit dae lughe divina:

invanu lu dileggiana e l’ insultana,

tantu a lu deviare non resultana

de cale siat modu chi lu leene.

Terza retroga

Santu Bachis, su martire romanu…

est dae Massimianu idu bene.

Terzu fiore

Intantu lu turmentana ca creene

chi l’ ispaventan gai cussu santu;

lu turmentana ca creene intantu

chi gai cussu santu l’ ispaventana;

intantu ca creene, lu turmentana,

chi zedat, ma ca resistit volonteri

in oriente si mandat presoneri

chi cumandat Antiogu Presidente.

Si mandat presoneri in oriente

chi Antiogu Presidente cumandat;

in oriente presoneri si mandat

de sa Siria in sa capitale,

Antiochia, chi est sede fatale

de tantos perseghidos cristianos.

Cando lu tenet Antiogu in manos

in logu ‘e patimentu lu trattenet;

cando in manos Antiogu lu tenet

de patimentu lu trattenet in logu;

cando in manos lu tenet Antiogu

faghet a Bachis su finale appellu,

cun Sergiu, Apuleiu e Marcellu,

s’ est ch’ in sa fid’ insoro issos persistini:

“Nois semus cristianos!” insistini

cun aspettu giocundu e coraggiosu.

Urtima retroga

Santu Bachis, su martire romanu…

…est bene idu da’ Massimianu

comente gherrieri valorosu.

Urtimu fiore

Diventat, c’ at potenzia, furiosu,

de morte sa sentenzia lis presentat;

furiosu, c’ at potenzia, diventat,

lis presentat de morte sa sentenzia;

diventat furiosu, c’ at potenzia,

dignos de morte barbara creet custos.

Battor soldados de sos pius robustos

pro tal’ usu si presentan armados;

de sos robustos pius battor soldados

si presentan armados pro tal’ usu;

battor soldados de sos robustos piusu,

cun battor vergas de ferru taglientes,

a sos battor eroes innozentes

cun furia colpan a su nudu sinu.

Tinghet s’ insoro samben su terrinu,

dae fora su coro si distinghet;

su terrinu s’ insoro samben tinghet,

dae fora si distinghet su coro;

tinghet su terrinu su samben insoro

chi essit bundante da’ totu sas venas:

in sas insoro pistadas carenas

bi at de vida un’ alenu lezeri.

Bachis intendet una oghe: “Abberi

s’ anima a s’ isperanzia, ca finidu

tenes dogni terrenu patimentu;

in premiu de sas penas chi as patidu

t’ avvias a s’ eternu godimentu!”

Iscultat sa oghe, a su chelu mirada

e cun su risu in laras ispirada.