Costantino Longu

Isterrida

Cun sa prus bella de sas cattedrales

sos madrilenos lu an onoradu

su santu de sos massaggios Isidoro;

inue sas famigliasa reales

ana pro tantos seculos pregadu

cun sos fideles sudditos insoro.

L’ an abbellida cun oggettos d’ oro,

cun arte rara istesit costruida,

cun impignu bi an leadu parte

totu sos prus famosos architettos;

L’ an abbellida d’ oro cun oggettos,

cun arte rara istesit costruida;

l’ an cun oggettos de oro abbellida,

istesit costruida cun rara arte,

cun impignu bi an leadu parte

totu sos architettos pius famosos.

Sos miraculos suos prodigiosos

ch’ in vid’ e in morte istesin operados,

in cussa cresia sun’ immortalados

cun operas iscultoreas, pittoricas,

e registradas sas datas istoricas

da’ bonos iscrittores sun bistadas.

Sas istoricas datas registradas

sun bistadas da’ bonos iscrittores,

in cussu tempiu l’ ana resu onores

s’ asburgica dinastia, sa borbonica.

Primu fiore

Sa maestosa mole architettonica

da’ lontanu si bidet luminosa

cando in oriente su manzanu

giaru e lughente ispuntat su sole.

S’ architettonica maestosa mole

da’ lontanu si bidet luminosa;

s’ architettonica mole maestosa

luminosa si bidet da’ lontanu,

cando in oriente su manzanu

giaru e lughente su sole ispuntat.

Risplendet gai proite l’ ammuntat

una cupola totu indeorada;

l’ an cussa cattedrale edificada

a Isidoro pro render omaggiu.

Una domitta cando fit massaggiu

bi teniat, terranza e poberitta;

cando massaggiu fit, una domitta

poberitta teniat e terranza,

però su fizigheddu, sa cumpanza,

li rendian consolu e allegria.

Segunda retroga

Cun sa prus bella de sas cattedrales…

…s’ asburgica, sa borbonica dinastia.

Segundu fiore

Duttore no este in teologia

né s’ est distintu che sacru oratore,

pro grazia divina est chi s’ at cintu

sa corona de gloria celeste.

In teologia duttore no este

né s’ est distintu che sacru oratore,

in teologia no este duttore

né che sacru oratore s’ est distintu,

pro grazia divina est chi s’ at cintu

de gloria celeste sa corona.

Sa santidade cun sa fama ona

passadu at sos confines ispagnolos;

da’ tempus antigu a sos sardignolos

beneittu at sos campos de su trigu;

a sos sardignolos da’ tempus antigu

sos campos de su trigu at beneittu.

L’ at invocadu dogni coro afflittu

e nois puru grazias li pedimos,

imbenugiados cun fide assistimos

a dogni cerimonia liturgica.

Urtima retroga

Cun sa prus bella de sas cattedrales…

…sa dinastia borbonica, s’ asburgica.

Urtimu fiore

In funzione b’ est sa Metallurgica

ue primma bi fit sa idatone;

sa Metallurgica b’ est in funzione

ue sa idatone bi fit primma;

s’ agricoltura nostra est totu frimma

non si nd’ ammirat dorados laores

né si nd’ intendet prus de aradores

fatt’ ‘e su giuo cantande a boghe lena.

Est cust’ adde de macchinas piena,

progredind’ est sa zona industriale,

da inue sa Sardigna centrale

isperat in dunu menzus avvenire.

Ma nois in Bolotana sighire

custa festa cherimos, Isidoro,

ammentande dogni tua virtude

cun immudada venerazione;

gai cheret sa noa gioventude

pro la sighire sa tradizione

ch’ an connotu da’ sos babbos insoro.

Infine, cun fervore ti l’ imploro,

a Presidente e a Comitadu

chi ana custa festa organizadu

grazias infinitas lis cunzedas,

e Comitados medas, medas, medas,

organizare si potan ancora;

pro te resultet sa nostra dimora

de sos fideles meta preferida.

Ecco sa moda mia chi est finida,

bos auguro paesanos mios

chi sa fortuna bos curzat a rios

e cun salude, minores e mannos,

la fettedas sa festa a medas annos.