Sas paràulas de sa libertade
lizeras bolant cun alas,
truvadas e carignadas
dae ideas bonas de mezoru,
pro giùghere su disizu
de una paghe giusta e durajola.

Sas paràulas de sa libertade
sunt che culumbas biancas,
acudint finas a chelu
e s’ispijant, fieras e galanas,
in sas abbas cristallinas
chi su velenu non podet toscare.

Sas paràulas de sa libertade
s’assimizant a isteddos:
non ponent mente a padronos!
Sa lugh’ issor’est donu pro sa note,
ghiant donzi caminante,
isterrent unu mantu a chie s’ amat.

Sas paràulas de sa libertade
sunt fiores profumados,
sos sèmenes vagabbundos
brotant in mesu a pedras e ispinas,
mudant logos in giardinos
de paghe e rebellias disarmadas.

Sas paràulas de sa libertade
intronant gal’ in s’aera
in sos campos già brujados
dae s’òdiu tzegu de tirannos
chi non proant piedade
pro frades chi no ant gurpa peruna.

Menzione al Premio di Poesia in Lingua Sarda Benvenuto Lobina 2026

©. Vanna Sanciu - Tutti i diritti riservati