Notte, o dulze notte:
Mi sezzo in sinu tou cuntemplende
Sa paghe chi as ispaltu in sa natura,
E cun tegus
Subra sa rocca assazo su lentore
A lughe de isteddos.
Inoghe pianto su versu.
Su calighe si pienat a buttios
Cun sa melodia chi abbrazzat sa frina.
Frimmu subra sa rocca,
S’umbra tua respiro o dulze notte
E ispalgo sos brazzos cun amore
Illuzzighinend’in s’aera,
Puntende sos oijos in su nudda:
Paghe ido in sas ispinas de sa vida,
E suspiros e ‘ijones
Asciuttos che pedra ‘e foghile.
Cantos sonnos incadenan sos mortales!
Trattene su respiru o notte:
Eo alcio su calighe a su ‘entu
Pro rezzire su asu de su cantu
Cun su lentore in sas laras,
Subra sa rocca,
Prima chi si ritiren sos isteddos.

C.P

©. 2026 Giovanni Camboni - Tutti i diritti riservati