Costantino Longu

S’ annu passadu, badde, fis piena

de incantos, che unu paradisu;

como ti ses mudada de improvvisu,

dogni cosa chi ch’ est mi faghet pena.

Pro me non prusu des essere amena

ca che mancat de mama su sorrisu;

mancad’ issa, mancadu est dogni accisu,

totu est tristu! E-i sa cantilena

de sos puzones puru paret trista.

S’ eranu chi est pro medas disaogu,

est pro me patimentu, su pius veru.

Como, pro cantu in su mundu esista,

non ti giamo piusu amenu logu

ma solamente “Badd’ ‘e disisperu”.

Ahi! pena chi su coro mi flagellas,

solu vagande, mi agato inue

mama istimada ses vivida tue,

oh ammentu! e cando ti cancellas?

E rimirande tristu sas istellas

chi brillan’ in s’ aèra senza nue,

cun boghes de piantu esclamo: a ue

sun boladas pro me sas cosas bellas?

E tue mama, chi forzis mi bies

in cust’ ora dae su regnu santu

e ses custos lamentos intendinde,

certu amorosamente mi sorries

nandemi: “Fizu, non piangas tantu,

ch’ eo gioias eternas sò godinde!”