Eh sì, caros piciocheddos! Sas vacantzas in colonia sun fnidas! Cun custa notte amos finidu de drommire in tenda e da-e cras torrat dognunu a domo sua! Po cussu arrodiade tottu affaca a mie ca bos narzo s'ultimu de sos contos de occannu, e poi si semus torra paris a sas vacantzas de s'annu chi enit, azzis a intender sos atteros, sos chi nisciunu s'ammentat prusu; ma assora, a sos tempos mios, cussos puru faghian parte de sa vida.
Chimbant'annos como tenia sa matessi edade ostra, e deo cun sos prus de s'edade mia, fumis poberos, ma poberos poberos!.
Eppuru no istamis tantu male: in sas annadas bonas mandigamis a soddisfatzione sas cosas chi benian accoltas a provvista po tottu s'annu, e in cussas malas mos arrangiamis su matessi cun sos fruttos arestes chi sa natura mos daiat a volontade.
Sa televisione no l’haian ancora inventada e a sos seros de iljerru s'unicu modu 'e che passare su tempus fuit a narrer contos a color'a fogu. Deo nd'app'intesu tantos, e bos potto narrer chi in tottu cussos contos de foghile - chi a bisatros paren faulas - b'iat semper unu fundu 'e veridade. A cussos tempos unu de sos prus mentovados fuit su contu de Boreddu... su matessi chi como deo bos conto. Iscultade bene!
Marietta e Giuanne fuin naschidos in su matessi ighinadu dae famiglias poberas, ma tottu tribagliadores. Su babbu de Marietta fuit cattolaggiu e su babbu de Giuanne mastru 'e linna. Sas muzzeres de cussos duos bravos omines si azzuain in dogni cosa: faghian su pane, filain e tessian sa lana, andain a su riu a samunare sa roba semper paris, e si cherian bene comente sorres.
Giuanne e Marietta fuin fattos mannos paris finas a edade de poder fagher famiglia a banda.
Po cussu dogni olta chi fuin solos faeddain de si cojuare e de si fagher sadomo.
"Mari" - narait Giuanne - "Appenas chi bi la fatto cun su inari comporo su terrinu e cuminzo a fagher sos fundamentos, poi attacco a fraigare su primmu apposentu".
"Eia, Giuà" - rispondiat issa - "Tue fraigas e deo impasto su ludu e ti apporzo sa pedra, però mi la segas a petzos piticcos".
"E va bene, Mari. Ma poi, appenas finidu su primmu aposentu chi mos selbit cernente salotto, nde fraigamos subitu un atteru po camera 'e lettu, cun duas frenestas mannas a car'a mare".
"Emmo, Giuà" - narat torra issa -. "Gai su manzanu chitto, appenas chi mo nde pesamos, las abberzo po fagher intrare s'aria frisca chi enit da-e sa marina".
"E poi faghimos una coghina manna manna cun d'una giminera chi bi isten sutta doighi cadreas, cun su pianu largu po poder ponner sos moggios de oltigu, sas trobiolas, e sa code po iscaldire su latte".
"Eia eia, Giuà" - narait Marietta tottu allegra -. "Gai, appenas finidu tottu podimos tenner unu pitzinnu e a nomene li ponimos Boreddu".
"Boreddu! Ite nomene bellu!" - narait Giuanne dandeli unu asigheddu in su chizzu -. "Appenas chi l'ischit babbu as a bier! Po regalu mos faghet unu bellu brassolu tottu frorizzadu, e cun cussu brassolu lu ninnamos in s'oru 'e sa giminera nandeli tantos bellos contos a color'a fogu".
"Eh nò, Giuà! A Boreddu no lu podimos ponner in s'oru 'e sa giminera! A t'ammentas chi susu b'est sa code po su latte?".
"Mari, su pitzinnu tenet dirittu a s'icaldire in s'oru e su fogu!"
"Tenes resone, Giuà! Ma pensa ..e si nde ruet sa code?". Si nde ruet sa code e che calat intro su brassolu mos bocchit su pitzinnu!" Intendinde cussas peraulas, Giuanne cuminzait a prangher comente unu pitzinneddu e a boghes narait:
"Est beru, Mari! Si nde ruet sa code mos bocchit a Boreddu!" Comente a su solitu Marietta e Giuanne addurain tres dies pranghinde a conca a pare, poi, cando passait tottu, cumintzam dae beli'a nou a fagher progettos.
Giuanne iscavait fundamentos, Marietta impastait su ludu e apporriat sa pedra po su primmu apposentu. Cando sa domo fuit finida ponian sos moggios e sas trobiolas subra sa giminera, e sa code po iscaldire su latte, e dogni olta, timinde de nde ruer cussa maladitta code, pranghian a succuttu:
"Ahi ahi! E ite si nde ruet sa code!! Si nde ruet sa code mos bocchit a Boreddu"!
Foltzis ad'a esser po cussu motivu chi Giuanne e Marietta non si sun mai cojados e no an fraigadu sa domo, cun sa code subra sa giminera, e Boreddu chi no est naschidu non curret perigulu de morrer si che li calat in conca!
E si, caros picioccos! a dies de oe in custu tempus modernu Marietta e Giuanne no esistin prusu, ma sos bisos bi sun ancora in dognunu de nois e no an a morrer mai.
S'importante est de nde chirrare sa code da subra 'e sa giminera, pro dare unu sensu a sa vida..,