CUDD’ALA DE SU NUDDA
di Nino Fois

Mi paret de la bider in s’oru de sa gianna, ficchida, isperiende su nudda, a pes una criadura de unos battor annos, gioghittende issa puru cun… su nudda.
E ite li fit restadu a Margarida, passada sa gherra, cando s’amoradu, su babbu de sa criaduredda, si che fit andadu comente iscumpàrfidu in su nudda? Nudda de su tottu, a infora de su fizigheddu chi pro issa, oramai fit tottu ca àteru nudda podiat aer.
E gai, comente mi l’ammento eo, che barigaiat oras intreas, immarmurada in s’oru de sa gianna, comente isettende unu nudda chi non podiat arrivire mai.
Eppuru, cumpridas sas faìnas de domo, si ficchiat igue, in s’oru de sa gianna, propiu comente isettende. Sena mancu, ma però, in cussas oras de mudìmine, sos sentidos suos viviant e, chie tiat poder ischire mai comente…
Mi paret de la bider, propiamente a s’interighinada, cun sa criaduredda sétzida in su giannile, a pes suos e issa inconada che rocca.
Non nd’aiat pérdidu nudda de sa bellesa sua, una bellesa galana, geniosa, piena de vida. Sos ojos de pinnadellu inchizonados in sos chizos nieddos e-i sas laras rujas e bias, pariant chi cherferant faeddare, narrer tottu su dolore, sa pelèa e-i s’amargura de su coro sou istraccu e iscréttidu.
Una paja de annos mi binchiat e istaiat in carrela. Medas bias, sende criaduras, nos frimmaimis a giogare, giogos innotzentes, sena appentos, sena cabu, chirchende de nos fagher pius mannos de sos chi fimis, sena pensamentos e oriolos, in s’innotzentzia pisedda. Ma su fogu no aiat tentu ca deo mi che fia andadu dae bidda pro istudiare.
Margarida non fit gai, tando, comente la fia mirende a sa torrada dae sa tzittade. E non fit gai no, comente l’aia lassada eo cun s’ispera de sighire su sónniu fantasiosu de sa pitzinnia nostra. Finas su sole nos pariat pius lùghidu, tando, sa luna pius imprateada e-i sos isteddos indeorados che prellas. Nos pariat de aer tottu in manu, in sas manos nostras astrintas dae s’ issultu* costoidu in sos coros nostros pitzinnos cun s’ojada a unu cras chi nos pariat attesu che-i sos fundales de s’ aera…
E gai mi che l’apo giutta finas a sas iscolas mannas. In mesu de sos liberos, dae unu fozu a s’àteru e, massimu in sas poesias… Issa fit Laura de Petrarca, Beatrice de Dante, sa bellesa e-i sa galania de sos versos de Pascoli e de D’Annunzio, “Gli affetti di una madre” o “La fiducia in Dio” de Giusti, Nerina o Silvia de Leopardi…
E tottu sena la bider pius, che foza leada a buléu dae su bentu chi in Bidda mia non si pasat mai. Una bolta ebbia l’aia bida cun sa coa de s’oju, dae sa pultescione de Nostra Segnora de sa Grascia in Tàttari.
Finas issa m’aiat sebestadu e, dae sas móvidas de sas laras aia cumpresu chi a suttaoghe mi fit giamende, ma eo non podia… non podia… fia in pultescione…

Cun sos ojos de s’ammentu como la bido igue… in s’oru de sa gianna, immarmurada a ojos ficcados in su nudda…
E non fit gai, cando l’est brotadu s’amore che brione a prima ojìda. Fit una die che-i sas àteras e issa fit in s’abba.
Fit pienende sa brocca arrambada a su benuju, a cando passat isse, bestidu in divisa de uffitziale, altu, istrìzile, pilibrundu e ojos de mare chi fit un’ispantu a lu mirare. S’abba nde birat dae sa brocca, l’infundet su benùju, s’anca, ma issa la lassat calare che abba sagrada.
Fit sola cun sa brocca e-i s’abba chi sighiat a currer…
Torrat in segus su soldadu, s’accurtziat a sa funtana e-i su coro sou, de Margarida, paret su de unu puzone chi cheret bessire a primu bolu.
Su furisteri pedit a buffare, issa li porrit sa brocca e isse cun dunu risigheddu: “Ti sei bagnata la gamba…”
“Uh!” li faghet issa comente a narrer: “Non li faghet nudda.”
E dae igue comintzat una vida noa pro sa pisedda e pro s’uffitziale.
E a mie, ma però, torradu a bidda a betzesa, mi paret de la bider che chi esseret deris, finas si che sunt colados medas annos, mesu seculu e pius, in s’ oru de sa gianna, tèttera, cun sos ojos ficcados in su nudda e-i sa criaduredda a pes suos cun nudda gioghende. Propiamente comente cando so torradu cumpridos sos istudios. Dae pagos annos, tando, fit passada sa gherra e tottu pariat torradu in paghe e in serenidade.
Ma, cantas feridas! Cantas piaes malas a cosire!
Sa die de sa funtana non b’ant postu meda a si cumprender Margarida e-i s’uffitziale: est bastada un’ojada, un’alénu, un’istrinta de coro, una làgrima finas a sas laras de fogu, unu dillìriu, un’ispera…
E dae igue a pagos meses accò su fruttu de s’amore in sas intragnas de sa pisedda.

“No! No, ma’! Non mi nd’impudo ca no apo fattu dannu a niunu! Custu est un’ingranzeu de Nostru Segnore chi at sagradu sos sentidos nostros: sos mios e-i sos suos ca nos cherimus bene. E duos chi si cherent bene, bene podent fagher, non male. Su chi apo in sas intragnas, l’amus chérfidu in duos e Deus l’at beneittu. Eo non m’apo a impudare mai de sa beneiscione de su Segnore. So segura chi cussu propiu non m’at a nogher!”
“Ma non l’as fattu segundu sa legge, fiza mi’” l’aiat nadu sa mama chirchende de la cuncordiare a s’istrumare pro non fagher birgonza in sa bidda.
“Sa zente podet pensare e narrer su chi cheret ma Margarida so eo pronta a mi leare gosu e pelèas sena peruna timória de faddire ma cun duna segurantzia manna e un’ispera chi niun’àtere podet medìre.

E nemmancu eo ca s’ispera e-i sa segurantzia chi apo intro de sa carena sunt sena làcanas che-i su mare, che-i s’aèra, che-i su mundu cant’est mannu”
“Ma custa beneitta gherra - sighit sa mama - at a sensare. E isse at a esser congedadu e tet aer bisonzu de unu tribagliu pro campare o, si nono, si nono…”
Margarida aiat catzadu fogu dae sos ojos abbaidendesi sa mama e, cun boghe allupada: “Nàrala! Nàrala sa peraula, ma’! Non timas – aiat sarragadu – Nàrami chi s’amoradu meu, finida sa gherra, si ch’andat! Nàralu, ma’!!! Ca, tantu est cussa sa timória tua… Ma, no est gai! Isse est veterinariu e-i su tribagliu già non l’at a mancare. Isse est su babbu de fizu meu! E comente tiat esser?!”
E, pianghende a sucutu aiat nadu chi non fit una cosa no ebbìa de timire ma, e nemmancu de pensare chi s’amoradu sou l’aèret abbandonada lassendela sena amparu a sas francas de su disisperu.
“De gherras nde tiant poder sensare chentu e chentu nde tiant poder iscomintzare ma isse non tiat poder viver sena de a mie e deo sena de a isse”.

Cando sa die de Sas Marias de su barantatrès est finida sa gherra, Margarida aiat leadu su de duos meses e-i s’uffitzialeddu dae igue a pagu tempus aiat dévidu lassare sa bidda pro andare cun sos cumpanzos suos in tràmuda a Roma.
Dae inie Margarida retziat donzi chida e donzi chida torraiat sa risposta cun lìtteras téssidas de amore e de isperas e infustas de làgrimas.
Donzi chida finas a sos primos de Martu e… posca pius nudda.
Margarida sighiat a l’iscrier ma non li torraiat peruna risposta finas a cando unu die, a sos primos de abrile, si presentant a sa pisedda su rettore e-i su maresciallu…

Pustis de pagas dies Margarida s’est illierada de s’orfanu de un’italianu mortu dae sos tedescos in dunu de cussos bisestros de su mese de martu de su ’44 in Roma.

_____________________________________________________________________________

• issultu = sussulto

24.12.03 Nino Fois