Agotzi Gian Piero

Cantos disizos e cantas isperas

in su bellu tempus de sa vida

istasione lugorosa e prus dechìda

prena d bisos, de milli chimeras.

Provas de lestresa e abilidade

solu arriscos e attrivimentos

amigos caros e divertimentos

e festas, in cudda primma edade.

No bi hat in beranu mezzus frore

de sas bajanas a festa bestidas

friscas che rosa, tottu coloridas

in sos ojos lis miras amore.

E su tempus no curret: si che ’olat!

E tisti cherrer ch’esseret frimmadu,

comente s’abba chi at maghinadu

gai no maghinat prus candho che colat.

Ma it’abbarrat de sa zovania

cumpanza de sa forza e sa bellesa,

candho benit in finis sa ’ezzesa?

Sol’un ammentu, tando, in finitia!