Salvatore Ladu

Bae prantaritedda vola – vola

L’isco chi ses suffrinde e mi dat pena

A t’intender m’irfritat cada vena

De sambene, ite cheres? Pranghe sola.

Su banzigu caente preparadu

De fenu modde ch’as bene intritziu

E cun santa passenzia imbuttiu

Tottu de lana, ti l’han cattigadu.

Che cando esseret fattu balentia

Cun vile istintu e cruda intenzione

Unu cainu a posta s’iscarpone

B’at postu supra e t’at mortu sa cria

Bolas in artu ma lestra t’abbassas

Che cando jutas sas alas ispuntas

Paret da’ ojos ti valene a giuntas

Sas lacrimas de dolu chi nde lassas

.

In sas pettorras mias e m’apperis

De nou a lacrimare sas feridas,

Bidende a tie betzas las ischidas

Piagas chi m’ammentana su eris.

Guida ‘e sa perdosa caminera

Ispera ‘e babbu, de mama cossolu

Narami tue si l’as bidu in bolu

Lughe ch’in coro intenniat s’ispera.

Cumprendo su dolore e su chi proas

Puzoneddu innossente e delicadu

Bae chi dae s’Altu ses miradu

Cras t’ada crescher aligheddas noas.

S’ada aberrer bentanas de lugore

Superande difitzile sa proa

Pro banzigare dae nou in coa

Su fruttu chi disizas de s’amore.

Ses istracca, finila s’anda e torra

Tocheddos a su coro nò azungas

Lassalu chi s’ispargat, nò mi pungas

Su frore abuttonadu in sa pettorra.