"Mamma’. La parola più dolce che ogni essere umano sogna di sentirsi rivolgere almeno una volta nella vita.
La parola che il protagonista non potrà mai pronunciare perché colei che doveva dargli la vita non lo ha permesso, impedendogli la crescita nel suo ventre, per poter riacquistare la libertà che, altrimenti, le sarebbe stata preclusa.

Meditiamo tutti sui lamenti di questo bambino mai nato.

UNA LITTERA A MAMMA

Sas peraulas chi no m’has mai nadu
sun iscrittas, cun tinta ‘e rimpiantu,
in calendarios suerados de ammentu.

Sos carignos chi tue m’has negadu
sun ganas in alas de ‘entu,
chi sas dudas han in manu arestadu.

Sa peraula chi no t’happo mai nadu
m’est, pro gula, fidele cumpagna,
arressa in sas laras de latte,
prima de poder bestire sa puma,
ca su piulu mi l’has furadu,
puzoneddu irde in s’intragna,
cando has pretesu de ti mudare
cun alas biancas de libertade,
pro sighire, liera, a bolare
in chelos altos de pitzinnia,
e no l’intendias sa oghe mia,
chi farfaruzas de amore dimandaiat.

E su toroju si l’hat gitu su ‘entu,
cosidu in tramas de olvidu,
ma su turmentu hat fattu su nidu,
in sa mente triulada ‘e su coro,
su cabiju ‘e s’afficu mai pius assaboro,
s’est trobeida s’ispera mia.

E tue s’isettu che l’has drommidu
in su banzigu agru de sa sorte mia;
deris fio lughe de fiama ia,
oe risu istudadu in lagrimas mudas.

Mama, proite?

Giovanna Maria Lai Dettori (Ozieri)