Ohi s’amore meu
Garriga so d’anneu
Ca no ti potto in brazzos affranzare
1
In dies longas e in notte frittas
Continu isto pensenne
Tue ite ses facchenne
Inumbe ses e in’umb’ abittas
Non resesso a zittire
De su coro su tristu lacrimare
2
Sa virgonzosa vivida aurora
De raggios coronada
De te pius no mi dada
novellas che divina ambasciadora
ogni istante ed’ogn’ora
intenno vanu su meu penare
3
Isto tottu su tempus pianghenne
Isettenne de te
Un’ammentu e me
Faghemi ischire inumbe ses vivenne
Forzis mi se pensenne
Mi muttis senza mi poder’ accattare
4
Puzzone chin su mare facches bolu
Zumpalu tottu cantu
Torramilu s’ispantu
Dae un’ispera a custu coro solu
Ae de mene dolu
Faghem’ischire cann’atta a torrare
5
Non podides puzzones de s’aera
In tanta disaura
De prantu e amargura
Abbellire de nou a primavera
Lassade sa chimera
Finide prestu so ostru olare
6
Mare azzurru e prufundu
Non ti mi mustres reu
Dae a su coro meu
Novas ch’ aspettas dae cussu munnu
No mantenza in fundu
Sas vhoches de su meu tribulare

7
Torrademi s’alenu senza male
Su sonnu e su recreu
Passo su tempu intreu
Aspettenne de te unu signale
Non b’at pena uguale
De unu amante novas ispettare
8
Ventos chi arribbades tempestosos
Nademi l’azzes bidu?
Dadu bos at affidu?
De dare a sos turmentos amorosos ?
Affannos burrascosos
So colenne pro culpa de ti amare
9
Sa partida fatale angustiosa
Est dolu a sa natura
E pro me disaura
Privadu m’at in coro e ogni cosa
Sa domo este una losa
Infusta da su meu lacrimare
10
Ti attitto e ti canto cun dolore
Amabile oriolu
Chi intro mi pones dolu
M’addranchidat de sa vida su sapore
In brazzos de duttore
Atta a finire su meu penare
11
Affazzada a sa via in sa ventana
Lu miro s’orizzonte
Su pranu chin su monte
De pasare sos ojos no an gana
Corjos e Niniana
Da uve intenno s’istria cantare

Ohi s’amore meu
Garriga so d’anneu
Ca no ti potto in brazzos affranzare