Ua ispina
de Pier Giuseppe Branca

Che alas de aeras risulanas
m’affórtigan sas cramas tuas forras
de coro frorizèndelas de ganas

noas contra su tempus ch’appo in corras
marinas inserradu a render vanas
pro te sas luas suas cand’aorras

de sos carignos mios donzi ruma
e mi tanghes cun fruas de cabijos
ch’in dossu intendo che attas de puma.

Cun càvanos che lizos galu lijos,
e undadas de pilos a ispuma
mi ghias a sa giaga ‘e sos baddijos

tuos, siddadu ‘e laores ch’a frina
de alenos s’ispàmpanat in bundas
de risu e paret sa matessi istrina

chi nos faghimis, ninnos, in sas frundas,
ferchende ranos de ua ispina
in restujos comente prendas brundas.

Sas matessi chi dae mill’‘eranos
e prus nos nde boddimus da’ sos ojos
cando in alas s’isbóligan sas manos

e che abbasanteras abras, pojos
rujamus lampizantes e arcanos
ue s’at a intender tra abbojos

e iscancos e basos e puntiglias,
sa mùida ‘e su samben a ripiccos
mudàrenos sas venas in ischìglias.

E chintos dae dillos de alliccos,
cando s’accheran grinas a mesìglias,
umpare amus a bier durches ticcos

de lugore a imbènnere peuttas
de gosu chi su currer de sas oras
at a bortare in lùghidas iscuttas

d’eternidade e inue anninnoras
amus a crèer frinas ledres… giuttas
in pinna ‘e undas a renas de voras

e a corras marinas, ch’a pispizu
pàsidu in marettadas de isteddos
nos an a render che unu disizu
bisos nostros in fruas de faeddos.


Mentzione de Onore – Setzione A – Poesia in rima Prémiu de poesia in limba sarda “A pes de Santu Padre” – VI Editzione Bortigale 16 de Sant’Andria 2019