Tui chi ascurtas
di Sandro Chiappori

De su marràgiu
annungiada ascurtas su mari
chi pòrtat bistiri di araxi
e mariciolu de durci amargura.
Est iscurighendi
e ti lòmpit de s’or’’e su mari
sa ‘oxi sarragada e carignosa
de unu poeta trogau de su nuscu
de zunchillus in frori.

Praxilis versus pispisaus
a giossu in sa plaja
bòddit po tui s’araxi
e cun àbidus lèbius
ddus spainat allada ‘e su marràgiu
ànca ses tui
po t’abbiatzai su coru tristu.

Notesta custu mari
pòrtat bistiri di araxi
e fintzas guefa indrollada de steddus
in s’impràssidu de una noti
chi nùscat de zunchillu in frori.
E duncas istimada mia
tanca is ogus
tui chi ascurtas
sa ‘oxi de cussu poeta.

Portaminci a mei puru,
noti ‘e scurigadroxu in su mari,
a innixi…
ànca deu ddu potza ascurtai.-

TU CHE ASCOLTI – Dalla scogliera/ triste ascolti il mare/ che ha il vestito di brezza/ e risacca di dolce malinconia./ Sta tramontando/ e ti giunge dalla riva del mare/ la voce roca ed amabile/ d’un poeta avvolto dal profumo/ di gigli di mare in fiore./ Dolci versi sussurrati/ giù in spiaggia/ raccoglie per te la brezza/ e con lievi respiri/ li spande verso la scogliera/ dove sei tu/ per ravvivare il tuo cuore triste./ Stanotte questo mare/ ha il vestito di brezza/ e persino scialle orlato di stelle/ nell’abbraccio di una notte/ che profuma di gigli di mare in fiore./ E dunque amore mio/ chiudi gli occhi/ tu che ascolti/ la voce di quel poeta./ Conduci anche me,/ notte di tramonto sul mare,/ laddove… io possa ascoltarlo.-

1° PREMIO alla Sezione “variante Campidanese”
1^ Edizione “ PREMIO D’ARTI – FAUSTINO ONNIS” - 2012