Erries, pranghes, bivis,
ses nae noale de ilighe,
caminas allestru in s’erba frisca
ispigando cantos de iscurigadorgios,
e… ses donosa
in su tempus de is bisos tuos.

‘Oles istimare, aperrer su coro,
e lebia che lentore
chi ballat in sa fogia ‘e s’orrosa,
t’aperis a s’amore.

Ma s’alidu tebidu ‘e su eranu
si furriat in odiu
e s’ocru apicat is bandelas suas.

Tue dilicada ermosura
orrues a suta de unu trugiu pugnale.

Tirat su entu
e in is antargiles silentziosos de is muros
s’acraeddat su frittu,
in s’isfaltu frorint milli pabaules orrubios,
no! Non funti pabaules
est su samene tuo chi brocoliat
e aboghinat su lumene de picioca isposa
… fiat ocru… s’omine ch’istimasa.

In su chelu sa luna silentziosa
cuat su prantu.

Tottu finit in d’unora ebia:
is ogos de velludu si serrant
in s’iscurigadorgiu de una die proinosa
in manos
de unu assassinu imbaddinau.

Menzione d’onore Sezione B al Premio Biennale di Poesia in Lingua Sarda “A pes de Santu Padre” di Bortigali 2013