Tritticu de una "Pasca"
di Francesco Sanna

ETIOPIA

E deo chi cust'Etiopia disizzada
mi l'isettai unu pagu pius zeniosa...!
Ma semper cando agattas una cosa
no est mai comente l'as immaginada.

Sa zente za est simpatica e curiosa,
ma sa bellesa tantu mentovada
devet esser su pruene chi l'at cuada,
o est sa vista ch'apo difettosa.

Tres chidas in postale assuculande
tra pulighe, bruttesa e i su calore
imbidio sos ch'in fora sun arande.

A s'antiga s'incunzat su laore,
unu triulat e duos sun bentulande.
Los abbaido... e mi frobo su suore !

ERITREA

Da s'etiopicu pulighe catzadu
mi l'apo iscampulada in Eritrea;
Asmara no m'est passia tantu fea
e inie s'animu istraccu apo ilbarriadu.

No mi fui mancu bene imbrossinadu
chi luego est comintzada sa pelea...
Torradu mi so a ponner a sa rea
tristu, chilcande un'atteru cunzadu.

Passande che Mosè su Rugiu Mare
apo cumpresu mezus sa resone
chi at fattu a Zesu Cristu dichiarare:

«Tenet sa tana fintzas su matzone
ma s'omine no at pedra po arrambare
sa conca, a si pasare s'afrissione ».

YEMEN

Ca cuddu chi sa conca l'at pasada
no li dat coro a cambiare cabita,
e male cussizzau da sa preita
chilcat solu caminos in calada.

In dogni istrobu invece nachi b'ada
un grassia po s'anima cuntrita;
e difattis in terra yemenita
agattadu apo torra sa ficcada.

Sa ficcada de antigas carovanas
chi da su regnu 'e Saba trazain "sale"
a sas terras chi tando fuin’ romanas.

Cumprendan sos chi poden sa morale
e no passen’ sa vida intr'e sas tanas
adorande cabita ... e capitale.

Pasca ‘e Abrile de su 1998