TRAPERA DE AFFANNOS

So inoghe, in aidos de chelu,
pro murghere rajos de sole.

Risittos de isteddos iscabados
sun cumpidende in forzeris de coro,
ilierende disizos mai nados.

Sas laras de s’anima
murmuttan bisos fittianos
a umbras de afficos chena cara.

So una trapera de affannos,
in sa tela istramada ‘e sa vida,
e mi los besto onzi die.

E no mi faddo mai sa mesura.

Hapo proadu a sestare s’afficu,
ma cussa foscighe est sempre ismarrada.

IRIS

Giovanna Maria Lai Dettori (Ozieri)