Poesia in lingua sarda
Ti amo
(si cantat che a No poto reposare)
No mi ndhe poto istare, zente amada,
Tue sàmbene meu e carre mia,
E m'est trummentu, dolu e maladia
Pro cantu ses penendhe dominada!
Sa libbertade tua solu bramo
Ca est su bene tou su chi amo!
Sardigna, prendha, rica 'e donzi bene,
A tilipendhe ses, disisperada!
Però s'ispera puru est destinada,
Che a totu sos àteros, pro tene!
Tandho, fortza! Corazu! Tot'unida,
Ca in sa libbertade bi est sa vida!
No istes a birgonza, umiliada:
Pesandhela, sa conca! Est fatu die!
E, mai prus, non dias fide a chie
Ti muntenet derruta, iscaminada!
Fàghedi onore, libbertade e istima:
Fortza, Sardigna, pèsadi e camina!
Ba'in bonora, bae, terra mia!
E sias beneita, amada zente!
Ti lugat in su chelu eternamente
S'istedhu de sa paghe a fagher ghia!
Fàghedi onore, libbertade e istima:
Fortza, Sardigna, pèsadi e camina!