Terzinas a Gesucristu e-a su Babbu
di Giuseppe Concas

Mi han battizadu appenas so naschidu
comente Zanne hat fattu a Tie,
e sa via santa hapo sighidu,

ma non fia’ cusciente cussa die
m ‘hana finzas su padrinu seberadu
chi a mannu hapo connottu chi fit chie,

mama e babbu mi hana educadu
ma deo so’ unu pagu dubbiosu
in sa luttrina chi m ‘han insinnadu

de fizu tuo ma misteriosu,
chi l‘hana mortu duamizza e pius annos,
ma so ‘de biere a tie disizosu,

so anzianu e in mesu e malannos
de te in parte conosco s ‘istoria
prego ma mi turban sos affannos,

como si falas tue da-e sa gloria
e ti presentas, e bi creo de piusu
ca m ‘est turbande finas sa memoria,

bies in s ‘umanidade tantu abusu
ca ses solu Tue su deus veru
totta sa terra non nde podet prusu,

es finas su credente in su misteru
che ogros bendados da-e su velu,
chi esistis Tue non li paret beru,

como beni a inoghe da-e su chelu
lassa su fizzu de s ‘Ispiritu Santu
ca in terra c ‘hat frittu e tantu gelu

gherras infames efragellu tantu
da-e su bruttu serpente sempre a maulu
poberas criaduras chi nde han prantu,

lea unu pro manu, a Pedru e Paulu,
sos chi c’un fizzu tuo han postu ordine
e mandana a s ‘inferru su diaulu,

Tue Babbu eternu e nostru domine
avvicina sos chi non t ‘han connottu,
e gai pius lontanu biede s ‘omine,
da ‘poi Onnipotente, a su devotu
serenidade e affettu amoribile
perdonu e salvamentu a tottu,

ca pro te a fagher est possibile
a convertire su pagu credente
e sanare su male pius terribile,

dare sa libertade a s ‘innotzente
e a su mundu intreu paghe santa,
s ‘anima sana e lucida sa mente

cun Tegus s ‘isperanzia e su sorrisu
pregamos sa Vergine Maria
de nos fagher de mama in paradisu.

Bolotana, su 20 de Nadale de su 2006