Tango
de Istèvene Flore

Sa fisarmònica
sonat
in sa note ballende
cando lèbios
sos passos
mi lu porrint su tempus
de una cantone muda
andantana
in s’ammentu.

Ti leo
e mi fues.
Ses s’umbra de su ’entu
chi andat e torrat.
In carres t’intendo
ses tota suerada.

Ti sigo in su passu
t’aferro
e ti lasso
ma solu pro pagu
ca in presse t’atopo.
A tempus de tango
a tempus de El choclo.

Sas cossitas caientes
sunt ambiddas chi fuent
a s’intritzu ’e sos passos
a su gustu ’e sa mente.
Ti ziro
mi fùrrio
ti afio e ti miro

Sa cara tua a sa mia
l’intendo afranzada
e sunt bàntzigu ’e fogu
sos costazos chillende.

Sa luna est falada
chi est guasi avreschende.
A tzocheddos de coro
m’arrisco prus zosso
cando a dolu m’ischido.
A tempus de tango
a tempus de El choclo.