Poesia in lingua sarda
Su vantidu
Terras arrìdas, sa sìcànna ‘e s’istiu.
Husinzos imprugheraos
In s’aghera
nushu ‘e vrutu atonzinu,
in sas bassuras
pinzelladas de tanàdu1 cannonau.
Pupujones minujos,
hapricos de emina illikidìa2
bundantes de sustassiosa durhura.
Gurdones carrigos
sonat s ’arramenta
manos pitzulihosas.
Dae manu in manu
hadinos3 prenos.
Atu atu
bratzos artiaos a illepiare sa aghìna4
hi achirrada in sos hanterjos.
Ispratas sas lavras
iscanzan su risu
pro s’urtimu issoloriu.
Su sole a pasare
in palas de Monte Gonare.
In sas hupas,
cropànt sos ballos.
Ispetu hi su cròmpiu
venza vinu.
Surzidu nigheddu,
ahede lohu
a unu verteru cannonau.
S’omine, nde podet gudire.
A furriu de mesas prenas
de donnia grassia e Deus,
pro s’amihu, s’istranzu
de hale si siada,
terra, holore o “Credo”
su vantidu ‘e Mamujada
sos animos a alligrare.
Note linguistiche
1 Tanàdu: di colore violaceo.
2 Illikidìa: “che ha partorito”
3 Hadìnos: Cesti, contenitori.
4 Aghìna: Faccenda, lavoro inteso come fatica.
Riconoscimento
Mamoiada, 16 gennaio 2018
Menzione - Sezione Cannonau di Mamoiada
27° Concorso di Poesia in Lingua sarda "Sant'Antoni de su o'u"