In-d-una bella notte 'e luna prena
so andadu a dormire a Supramonte
e cun s'isfera lughente de fronte
fit incantada sa montagna amena.

Pariat d'esser in-d-un'artu ponte
ligadu a chelu cun forte cadena:
sa gula de Gorropu in cussa iscena
fit che sa 'uca 'e su regnu 'e Caronte;

No est sa fantasia 'e su poeta
chi delirante cumponet su versu
ma est propiu sa veridade neta

chi pariat unu mundu diversu
antzis unu diversu pianeta
girande cun sa luna in s'universu.