Salvatore Ladu

Su sero est un'incantu, est de maghia

Artu passizat su sole, valande

Cara a ponente chi nos paret nande

Prite custa mattana, ite cherides!

In custu mundu 'e fada e non ponides

Cantos d'amore in sarda poesia?

In sas baddes de chercos coronada

Cantan sos puzoneddos in amore

S'ape suzande mele a cada frore

E cada frore profumos mandande.

A tocheddos de coro so messande

Ispigas d'oro pro su chi non ndada.

Pro cantos chircan rajos de lugura

Verteros che sas notes de veranu,

Una manu d'astringhere, una manu

Ch'azudu dada in sas oras d'apretu

Unu coro ch'ascurtada in segretu

Galanu alenu forte in s'ora iscura

A su poeta mudu in s'arte sua

Li tocheddada in sinu s'inzustissia

Cun ungras de astore, e sa malissia

De sa zente non lu lassat cantare

Versos chi peset su coro a bolare

Notas festosas, durche un'anninnia.

Issu ch'est vida che s'astru fidele

Isparghende 'e durcura cada tretu

Narat che babbu vonu istadi netu

E non t'arrendas in oras d'iscuru

Cras des collire su frutu maduru

S'as pastinadu in cussorjas de mele.

E su sole pintande chelos d'oro

Urigiat cun sa luna e la cussizat

De nos tentare in sa notte, s'abizat

de s'omine ch'at bisos agurtios

Prontoso a messer ma pagh'ingranios

Sos ch'abbelenat su samben in coro

Pastore anticu, mamidda caente

Chi amat custa terra, a pascher jughet

Sinos astraos, caentat e lughet

Frorit sos campos, fozit su padente.