Su risu pone in bia
de Domenico Angelo Fadda

Po apentu su risu pone in bia
cun sos colores bios de sa rosa.

Cando sos ojos aberis diciosa
cun fiores in cara mi nde feris
diciosa cando sos ojos aberis
bido in istellas logos chi sun mios.

Po apentu su risu pone in bia
cun sos colores de sa rosa ‘ios.

Si riende m’abratzan chentz’afios
mai lagrimas inoghe mi lassan
riende chentz’afios si m’abratzan,
cumpensendemi ‘e totu sos suores.

Po apentu su risu pone in bia
de sa rosa cun sos bios colores.

An de s’eranu pintos e lugores
e paren fatos da’ Deus a manu
pintos an e lugores de s’eranu
chi nd’est fintza su chelu in allegria.

Cun sos colores bios de sa rosa
po apentu su risu pone in bia.

Mi sun caros ca tenen fantasia
e m’atzenden sas ganas semper giàros
ca tenen fantasia mi sun caros
selenos ti los miro ogni mamentu.

Cun sos colores bios de sa rosa
pone in bia su risu po apentu

Cun basos de fortuna so cuntentu
ca su sole presentan e sa luna
so cuntentu cun basos de fortuna
chi die e notte lughes apo in bisu.

Cun sos colores bios de sa rosa
pone in bia po apentu su risu

Benes an in s’isfadu cundivisu
ca sa vida unu coro lis at dadu
an cundivisu benes in s’isfadu
bramende amore e paghe in ogni cosa.

Po apentu su risu pone in bia
cun sos colores bios de sa rosa

Menzione d’onore - 22 Edizione 31 AGOSTO 2013 al Premio di Poesia Remundu Piras - Biddanoa Monteleone