Agotzi Gian Piero

“Pocos e locos e male unidos“

che maledissione l’appo intesu

su coro est affrizidu e offesu

ca sos Sardos sun sempre divididos.

Ma si nde bogas custos pagos males

no b’hada in sas terras de su mundu

zente de coro o animu profundu

ch’a frades nostros sien uguales.

In s’isula nostra amada e cara

virtudes nd’amos medas in usansia

fide, onore, valore, amigansia

de sa prus vera, cristallina e rara.

Chi est unu Sardu a su presente,

it’omine in su cras benidore?

Esser de contributos pedidore,

e che iscrau semper dependente?

In annos de faltza autonomia

vissios, trastuglìas amos connottu,

sos italianos a derettu o trottu

nos han dau preita e mandronia.

Su Sardu est frimmu e attontadu

in su mundu modernu e globale,

no bolat da nidu est naturale

a sa paga proenda imbitzadu.

Ispero a s’imbesse, chi sas mentes

currinde in andalas de isperu,

abbratzen Sardos a su mundu interu

ponindesi cun populos e zentes.

Orgogliu, dignidade, e cussensia

de aer in d’unu cras su destinu,

est diffitzile, longu su caminu,

ma est cussu, est cussu che sentensia.

Chi si boghet de terachia sos pannos,

hat su logu, benes, limba antiga,

lacanas, istoria, betza istiga,

cant’e mezus de populos prus mannos.

Sa ‘ia no est deretta ne in paris,

no ti dan manc’abba in custa terra

si no tirrias, si no faghes gherra.

Sardos cun cor’e boghe: “FORTZA PARIS!”