In difesa 'e sa marina
hammur fattu una muralla
pro millenior de rapina
penande da' in gherra in gherra
affrontad'ogni batalla
trisinende vunc'a terra.

Hammur fattu isioner d'oro
pro sa groria 'e s'ispada;
traessau ogni contrada,
tempur vonu e tempur malu:
e ruende! Ma su coro...
su coro respirat galu.

Però, oje, custa terra
non prus isula, s'intendet
chene difesa in su mare;
e minettosa s'intendet
una morte silenziosa.
Solu frores pro una losa
det semmenare sa gherra.
Su rezintu 'e su nurache
anticu, non prur fortesa,
lu jumpemmus chin lestresa
prima chi enzat su lampu
e prantemus in su campu
una voresta 'e pache.

De mannos una cadena
tendamus pro saludare
accomunande ogni pena
chi' sa zente 'e sa terra
e affochemus in su mare
ogni bria e cuntierra.

Ecco apertu pro imparare
s'universu sillabariu
po nos cumprendere a-pare
chi frader d'ogni colore
pro chi su campu 'e s'amore
nos diventet unu sudariu.