Su chi podet sa paraula
di Antonio Brundu

Podet isterrer nues de bambache
In chelos inturtados de tristura;
Podet isorver tintas d'ermosura
Ispaghinande semenes de pache.

Podet aperrer alas de durcura,
Chin galania, che su pisinache,
E podet tesser in cada nurache
Tramas dechidas chintas de friscura.

Podet infunder d'oro sos beranos,
Si fachet iscazare sa bidhia,
Pintande de lentore sos manzanos.

Podet inchender de nuscos sas rosas,
Chin sos carignos de sa poesia,
Cando s'isparghen sas rimas donosas.

"Premio Speciale della Giuria" - Premiu Logudoro 2007 - Otieri