S’ischidat Predu cuntentu che pasca
pro pigare a sas catzas de Sant’Anna,
armadu de fusile a dòpia canna
e cartutzera de marca Bereta,
binu, abardende, ticu d’aniseta
e pane chin aunz’ ‘intro sa tasca.

S’aboju cuncurdadu chin sa crica
est pro sas chimbe in “Prata ‘e su Comunu”
pro detzìder s’ingàrrigu ‘e donzunu:
su tale truvat fera a s’imbucada,
fulanu in mesu andàine ‘e “roca lada”
e Predu... in s’ispuntone ‘e “ bena sica”.

E che lu colat totu su manzanu
setidu in mesu trempa... a frina in cara,
atesu est totu abòghiu: “ispara, ispara!”...
in tretos suos non colat colora,
e tzedende sas fortzas a s’ispora
mìriat sas boghes ch’intendet lontanu.

E chin su culu ifustu e frittu a pè’
l’annùntzian s’adunada ‘e mesudie,
s’unicu iscàmpiu selenu ‘e sa die
chi li torrat su sàmbene in s’ingrana
posca sos basos de sa tramuntana
a cuddas laras...in tinta ‘e cafè.

E chin sa bàvula in sa lara areste
cundit set’otto faulas in cuile:
“ Sirvones ch’an timìdu su fusile,
fuidos sono... a su nuscu ‘e sa canna”,
e poi ancora... irbutzèndela manna:
“Mort’unu nd’apo... ma fuidu m’este!”

De che ghirare benit sa bon’ora
chin s’archibusu lùtzigu e pulidu,
sentz’aer fertu, tentu, intesu e bidu
peruna fera... mancu pro errore!
E chin sa muta ifusta ‘e malumore,
tres Ôs si coghet…in sa cassalora”.

2° premio – Premiu poesia sarda – Mamoiada 2025