SU CANTIGU ‘E SU SUERZU

Mira chi nd’app’idu de peleos
da cando in terra sarda so’naschìdu
malas temporadas, bentos feos,
m’ana troffizzadu, m’an flettidu
ma deo apo semper resistidu
che zigante binchinde sos anneos.

Sutta sas frunzas mias appozzosas,
meriagu de laghinza e madrigadu,
cun lande e sidas bundanziosas
cantos tazzos appo sustentadu.
Ca semper bon’amparu so’ istadu
in annadas malas, tempestosas.

Cun s’urtigu meu pretziosu
dae tempos antigos sos profettos
a s’omine apo dadu, birtudosu,
alapinnas e ammuntos de pinnettos,
moggios e trobias, istelzos nettos
pro alimentos, resu mi an donosu.

Cantas bortas m’ap’ogadu su cobbanu,
e cun sa rusca ruggia so adduradu,
poi cun su tempus, pianu-pianu,
de nou mi l’ant sos annos torradu.
Mai nudda app’eo dissipadu:
a s’omine appo dadu colzu e ranu.

Como chi so’ etzu e matziganu
a murr’ in terra, tortu e incurbadu,
mi la passo isettende bonu eranu,
c’appo galu su coro attarzadu.
Torro grascias a Deus ca salvadu
mi soe, dae su fogu de s’umanu.

Giovanni Michele Migali

 

Statistiche sito,contatore visite, counter web invisibile
WOP!WEB Servizi per siti web. Contatori, statistiche, forum, sondaggi... GRATIS!