De sa pitzinni’in tottu sos ammentos
mi b’agatto iscanu deo puru
cussos si, fini tempos de cuntentos
chena problemas, creo, de seguru.

Fini tempos chi sos cumandamentos
fin’iscrittos in coro no in muru;
cussu coro oe si est fattu duru
e vivimus cun ois e cun lamentos.

Ma cussu tempus, deo so cuntentu,
de l’haer connottu che unu tesoro.
Si mi narana, pro unu portentu,

de lu jambare a postu de s’oro,
no mi lu sigo no, cussu inventu.
Ca cussu tempus l’app’in su coro,

l’istringo, l’abbrazzo, che mama mia,
su bellu tempus de sa pizzinnia.

Ittiri, 31-12-1999