Su barroccio 'e sa sorte

Cantas penas hapo ilieradu,
in sas nottes de iza,
isparghende sas alas de chera,
in su fogarone ‘e sa vida,
e tenzende sas coeddas de entu,
a unu sonniu chi riende ch’est fuidu.

Cantas promissas hapo fattu a sa luna,
cumassende su pane ‘e s’ammentu,
in sa mesa de unu disizu.

E istanotte so ancora inoghe,
istringhende sas giuntas istraccas,
pro entulare basolos de ura,
fin’a cantu mi lughet s’ispera.

Ma a trazare su barroccio ‘e sa sorte
est restadu solu un’ainu ispilidu,
forsis pius bezzu de a mie,
chi si ruet sempre in s’andare.

Giovanna Maria Lai Dettori (Ozieri)

 

Statistiche sito,contatore visite, counter web invisibile
WOP!WEB Servizi per siti web. Contatori, statistiche, forum, sondaggi... GRATIS!