Su primu amore
de Mario Puddu

Su tochedhu ’e su coro t’intendhia
ca totu sos sentidos fint cantendhe,
sa boghe tua che un’armonia
e fintzas carchi làgrima falendhe.

E candho a prima lughe ti apo bidu
cun sos ogritos mios incantados
sa cara tua mi as imprimidu
che in su coro ’e sos innamorados.

In ogros e in laras ti lezia
sa cara ’e Deus chi mi as mustradu;
su primu amore tue, mamma mia!
Sas laras mi as a ríere iscanzadu.

Ses su ponte de totu sos amores;
ses beneita, e sias!, mamma bella!
e fintzas in su chelu ’e su Segnore
as a lúghere sempre che istella!


Mentzione in su Premiu biennale 'e Poesia "Poete Jorzi Pinna 1902-1970" Puttumajore 2019