A muzere mia

Su ballu 'e sa vida

di Benito Saba (2009)

Cun móvida 'e pitzinna ballas tue,
cun su grustu ischieradu crabïolas
e ingruppis de coddos, isculiende,
ojos a terra,
iscanzu lébiu in laras,
tzoccas sas manos, tzoccas e brinchittas,
andas, galana,
e torras, unda 'e mare.

Sa mùsica t'imbòligat allegra,
sa chiza tua paret discansosa,
ma deo l'isco a ite ses pensende...
Sa vida t'est passada che una die
da' su manzanu 'e hoe
piena e lestra,
pagora, no, issara fis pisedda...
bajana... isposa... mama de tres fizos...
a sa domo accudende e a su trabagliu...
Non ti cheres frimmare
e custu ballu
no est pro te s'appentu 'e unu sero,
est festa 'e sa balia feminina
déchida in cara,
ma detzisa in coro:
totu s'amore tou illacanadu
pro chertare e gherrare chene pasu,
càlida ermosa fiama bia e forte!

Ti ses fatta cumprida totindunu...
E mi 'ettas ojadas de accordu...

*************

A mia moglie

Il ballo della vita

Con movenza di bambina tu balli, / con il gruppo schierato piroetti / e fai spallucce, sculettando, / a occhi bassi, / sorriso lieve sulle labbra, / batti le mani, batti e saltelli, / vai, attraente, / e ritorni, onda di mare. /
La musica allegra t'avvolge, / il tuo volto appare spensierato, / ma io so a cosa pensi... / La vita ti è trascorsa come un giorno / dal mattino d'oggi / intensa e veloce, / poc'anzi, no, or ora eri ragazzina... / signorina... sposa... mamma di tre figli... / dedita alla famiglia ed alla professione... / Non vuoi fermarti / e questo ballo / non è per te lo svago di una sera, / è celebrazione dell'energia femminile / graziosa e gentile in viso, / ma risoluta in cuore: / tutto il tuo amore sconfinato / per lottare e combattere senza tregua, / calda avvenente fiamma viva e forte! / Tutt'a un tratto hai assunto un atteggiamento compito... /E mi lanci sguardi fugaci d'intesa...

MENZIONE D’ONORE AL XXIII CONCORSO DI POESIA SARDA - OSSI - 2009