Sos fruttos de s'annada
de Vittorio Falchi

a Salvadore Murgia pastore generosu de masones rassos

Como chi sun naschinde sos anzones
e regoglis sos fruttos de s'annada
bides chi sa fadiga est cumpensada
e agabadas sas tribulasciones.

Su miraculu mannu de sa vida
lu tenes sutta ojos fittianu
massimu cando torrat su beranu
e onzi costa e badde est fiorida,

ei sas primas lughes de manzanu
azzendet de fiamas sas aeras
e si nudrit su coro de isperas
pro sos donos de Deus Soberanu.

Deus innanti haiat dadu in donu
a s'omine animales e pastura
pro chi de totu haeret tentu cura
sena lassare nudda in abbandonu.

Pero s'omine ingratu s'est mustradu
creindesi padronu de onzi cosa
e de su male in ira furiosa
cantaros, mare e rios hat luadu.

Sa terra hat vilipesu, l'hat offesa
l'hat brujada, avvilida e ispozada,
de forestas l'hat misera parada
in desertu giambende onzi bellesa.

Tue cun sacrifiziu e isperas
in sa cussorza ch'has in Pubusone
t'has costruidu unu bellu cuzone
de paradisu inue solu imperas.

E in cue appagas sos disizos
de sos benes primarzos de sa vida:
de muzere s'istima aggradessida
s'amore de nebodes e de fizos.

E su fruttu de s'ama l'has in cue
sos anzones ch'ischertian in campagna
cantu amore suguzan in s'intragna
e canta emozione l'ischis tue

cando benin a ti lingher sa manu
piena de premura e alimentu
e tue los carignas, ses cuntentu
no has suffertu e tribuladu invanu.

E cando giughes s'ama a pasculare
de su ferru ti sonat su tintinnu
su coro ammajat e torrat pizzinnu
in giogos de amore a sonniare.

E no est unu sonniu s'incantu
de sa terra chi brotat e fiorit
cando su sole iscaldit e colorit
su criadu cun lughes de ispantu?

E cando a sero una tebia frina
ti carignat sa suerada cara
sentis in coro una deliscia rara
sensos profundos de paghe divina.

E si a boltas t'istringhet sa 'ula
unu singultu chi s'anima ferit
miras su chelu giaru e t'allezerit
su pesu de sa mandra e de sa tula.

Eo inoghe mi pinto tancas mannas
cun ferula in fiore e iscareu,
no tenet muros custu regnu meu
ne balcones, ne làcanas ne giannas,

a ue poto giugher sos amigos
in giardinos de vera poesia
in s'ora chi cun grascia e armonia
a su 'entu si nannigan sos trigos.

Hap'a proare gustu e piaghere
de fraigare sonnios a muntone
si benzo a t'agatare a Pubusone
inue tue ses teraccu e mere

pro remuzare in tota sa cussorza
de poesia e rosas su tesoro,
chi m'alimentet s'anima e su coro
prima chi de sa gana mi nde morza.


Roma 10 de martu de su 2010