Salvatore Ladu

Nono chi no m’istracco ‘e sonniare

Lugorosas e riccas istajones

Ingranidas ispigas e burdones

Ch'ispetta s'ora de los binnennare

Innidos chelos pro las ascurtare

De sos poetas sardos sas cantones.

Nues bragheras, alidu 'e caentu

Chi vattin abba a campos semenaos

Cando a sa mente torran bulluzzaos

Sos progettos leados da su entu

Intendo solu mammas a lamentu

Agasazzande coros astragaos.

Bo che sezzis andados a inue?

Isteddos cun promissa è tempos bonos

E cun s'illusione 'e milli donos

Affiancadu d'anzelos tottue.

Prit'azzes permittidu a custa nue

De m'enner supra cun lampos e tronos?.

Si custu coro disizzat de dare

Basos de sole cun froccos d'amore

Una lacrima 'e gosu e de lentore

Tancas frorias, de paghe unu mare

Su bene chi si pottat disizzare

Sende, de tottu custu pedidore.

Disizu 'e chelos nettos, impuddiles

D'incantu, cun sos urtimos isteddos

Pastore a giogu fattu 'e anzoneddos

Su latte a lapiolos in cuiles

Avverandesi sonnios prus dechìles

Basos d'amore, iscambiu de aneddos.

Sonnio in cust'iscuru, carchi ispera

De lughe, de cossolu a coros frittos

Pro chi torrene in laras sos risotto.

E custa nue, ch'iscurat s'aera

Cras potta narrer chi fìt passizzera

Caentu d'altu eranu in custos litos.

Mamma chi sambene e latte m'at dadu

Cun lughe fissa e bramas in su coro

Mi cussizzavat, cun fide e decoro

Chi Deus no at fizu ismentigadu.