Luna bella

Ti ses pesanne tue bella luna
dae sas puntas artas de su monte
illuminenne tottu s’orizonte
de cannidu lucore sa laguna

Su sole at’pinniccadu sa bronte
achenne sa campagna tottu bruna
ma tue cumparenne tott’in d’una
su nigheddu irjaris de cheronte

E a sa nue bianca passizera
chi ti belat sa cara indiorada
li cunfido a issa chin s’ispera

pessamentos e sa pena cubada
al’issorver vagabunda lizzera
in sa croncula lacan’isteddada.

Luna masèda

Dae undas pasàdas de su mare
sa luna istasero m’er masèda
imbolicada de ilos de seda
ses pesanne galana a la mirare.

S’intenet’de sa thronca su cantare
dae s’umbra cubada in d’una preda
paris chin iscia sa luna maseda
fachen su coro meu illepiare.

Chin sas penàs appen’olvidenne
un’ alidòre birde assapòro
de frogheddas nobales’ispuntenne

E in brazzoz sicuros che tesoro
paret’chi galu mi son ninnienne
e de pizzinnu mi torrat su coro.

Nu -2018