Si non b’at allegria…
di Antonio Piras

Si non b’at allegria e bonumore
s’omine si morit prima ‘e s’ora!

Custa vida majarza, traitora
mi nde dat una calda e una frita:
cando mi paret d’esser in cabita
tot’in d’una m’agat’a sa fine.

Si non b’at allegria e bonumore
prima ‘e s’ora si morit s’ omìne!

Cadatantu m’azuat calchi machine
a mi fagher su coro prus cuntentu
e mi carignat, a ispidientu,
chi tota sa pessone si colorit.

Si non b’at allegria e bonumore
prima ‘e s’ora s’omine si morit!

Faghet manna sa pranta e fiorit
ca l’azuan su sole e-i sa lughe.
Si mancan issos paret post’in rughe:
ne bi creschet e ne leat colore!

S’omine si morit prima ‘e s’ora
si non b’at allegria e bonumore!

Iscanzade sos bratzos a s’amore
e sas laras a risos ischisitos
po allegrare dolos e atitos,
chi sa tristura leet atera via!

S’omine si morit prima ‘e s’ora
si non b’at bonumore e allegria!

Finas in cudda peus maladia
faghet bene a rier e brullare
ca nos azuat a che la colare
custa misera vida tribulada!

S’omine si morit prima ‘e s’ora
si bonumore e allegria non b’ada!

Sende acanta a s’ultima frimada
cheria leare su passu lenu lenu
po mi ch’andare serenu serenu
a risu in laras a cudda dimora.

Si non b’at allegria e bonumore
s’omine si morit prima ‘e s’ora!

26-07-2007