Sestru 'e s'isermore
de Pier Giuseppe Branca


Dae custu giannile a unu ‘oe,
frades mios, cun lùghidas isperas,
miro su tempus bìdrigu de oe

pro bi chircare aniscas galaveras
chi a su cras sian ura 'e bonu proe.
Ma chentales de pìdigas aeras

mi faghen tìmer' chi in su benidore
sighire amos a pè pittiriaccas
peleosas de làstima e rancore.

Dae manos, de pasu infertu istraccas,
amos a perder' s'estru 'e s'isermore
mirende nos las bènnere teraccas

de no ischimos mancu cale isbagliu
nos eppat, dae òmines de judu,
mudadu in zente chena prus tribagliu.

E gai amos a viver' in s'impudu
d'aer' crètidu a cussu giogu vagliu
chi, trasuleri, nos at postu a nudu

sa neghe 'e olvidare sos insinzos
de cussa sabiesa 'e contivizu
chi no tzedìat a sos pistighinzos;

ue sa dignidade fit ricchesa
cumone, mama e fiza 'e se matessi,
pane ch' ammeraìat coro e mesa

de sos chi resessìan, a su nessi,
a lograre cun seru sa tzertesa
de no colare die essi per essi.

E ue s'agateren in su mundu,
appende afficcu in se, frade cun frade
s'aggiuaìan paris ca in fundu

s'esser'zente de bona voluntade
nde faghiada òmines de bundu,
ghiadores de cussa dignidade

ue est ora'e torrare fittianos,
frades mios, e sòlver' s'iscurore
de custos tempos malos e metzanos

pro chi in sos chelos de su 'enidore
nos torret intr' 'e coro e in sas manos,
miraculosu, s'estru 'e s'isermore.

 

Primu Premiu Rima a tema impostu Dignidade: fiza e mama de … setzione Musserradu Meridda - Premiu Logudoro Otieri 2013