Serenadda bizzarra
di Pompeo Calvia

Eu cantu e tu licchitta
bocca di basgi e fiori,
i la muddina fitta
lassi lu cantadori.

Chi odori di frisgioli
n'esci da la to' gianna!
Bedda! a chi no cunsoli
un cori chi no inganna!

La frisgioledda abani
getta, prenda adoradda,
da li to' bianchi mani
dammila inzuccaradda.

In ciambu eju ti doggu
canti di passioni,
abbri la janna un poggu
e tanca lu balconi.

Eu no ti fozzu nienti
parchì ti vogliu be',
solu tu basgi a me
eu a te si tu cunsenti.

Lu basgiu è che un lamentu
innant'a lu cantinu,
zi lu porta lu ventu
che fogli di giajminu.

Prenda istimadda e cori,
piobi e no vò finì...
Parchì lassi cussì
unu chi pà te mori?...

Statistiche sito,contatore visite, counter web invisibile
WOP!WEB Servizi per siti web. Contatori, statistiche, forum, sondaggi... GRATIS!