Semus tottu frades
di Rosina Cossu

In custa vid’ hapo sempre gosadu,
ca mai m’est mancadu s’alimentu,
mai hapo cunsideradu lamentu
de unu frad’ attes’ ismentigadu.

In momentos de tristu pensamentu,
contende sos annos chi fin passende,
e umbras de ser’ hap’ intesu falende
alidu nou m’hat porridu su entu.

Mi so ninnada tropp’ in s’ egoismu,
carignende gos’ e beneistare,
mudas sas dies faghio colare,
eppur’ odiaio su razzismu

“ Pontes de dolore e de anneu
los distruet solidariedade,
hapedas coro ‘e umanidade
e sempr’ amore pro su mund’ intreu”

De babb’e mamma fin custos sos sentidos
chi su tempus m’haiat fatt’ olvidare,
ma prim’ o poi los torras ammentare,
in s’innid’ ‘e su coro sun custodidos.

Damus a custos frades un’ispera
pro famine e poveras pannias,
pius connoschan gherras e maladias,
innos de gosu canten a s’aera.

Siemus fittianos de caridade,
fattemus de sa vid’ ateru impreu,
grascias pius mannas nos hat dare Deu(s)
giambende s’affannu in bonidade.

Si a issos istamus a fiancu
ogni dolore hat a benner mancu,
de Deus tottu frades e fizos suos,
implorendel’ isperas e azuos.

Mores